رأيكم في بي أم 528 موديل 97 ؟.؟؟ رأيكم مهم

أنا شخصياً ما جربت البي أم

لكن سيارة مضى تقريباً 18 سنة أكيد بتطلب صيانة وقطع

والبي أم قطعة غالية وما أدري هل عندك مجال لصيانة متكررة وزيارة للتشليح كل شهر

رأيي إذا رغبان بي أم ترفع ميزانيتك شوي وتاخذ 2004 أو 2005

موفق

والله ياخوي انا مالي رغبه بالبي ام لكن خوي لي ميزانيته 17000 و ركب البي ام و أصر عليها فانا قلت اسأل و أشوف الاراء و مشكووووووور

وعليكم السلام ورحة الله وبركاته

شوف اخوي انا عندي بي ام 740 موديلها 97. وبعطيك الايجابيات والسلبيات
سيارة روعة وصيانتها متوسطة لكن لا يقربها واحد مو فاهم بي ام, قطعها رخيصة يعني المساعد الواحد ب 200 ريال, كراسي مكينة الواحد ب 150 صفاية بنزين ب 60-70 ريال وكذا اسعار القطع
بالنسبة للقطع اذا تحافظ على صيانتها كل فترة وتسوي لها جدول بإذن الله ما تطلب منك قطع.
الحرارة دام ما فيها تهريب او مشكلة انسى شي اسمه حرارة ومكيفها حلو. (عندي كامري 2013 اشوف مكيف البي ام احلى)
بالنسبة للاسعار متفاوتة حسب النضافة والمواصفات.
المشكلة اللي تخلي الناس يبعدون عن البي ام هي اذا خرب فيها اي شي يقعدون الميكانيك يتفلسفون براسك
يعني تخيل مرة صارت عندي تفتفة والسيارة تطفى واحد قال ايرماس واحد قال بخاخات واحد قال حساسات اكسجين وواحد قال كويلات وغيرتها ولا ظبطت وبالاخير بالصدفة واحد اكتشف انه لي طول الاصبع مقطول ولا كلف 5 ريال
و اهم شي قبل الشراء طلعها على حفرة وافتح صرة زيت الجربوكس اذا لونه اسود حط في بالك تغيير جربوكس بعد فترة  واذا كان لساته الزيت مو محروق غيرله الزيت تدريجياً.
اعتذر طولت عليك بس بعطيك صورة عن استخدامها (ونصيحة لا تقرب موديلات 2002 وفوق لانها حساسة مرة). ولا تنسى الاستخارة.

ما قصرت يا غالي و الله يسعدك

راى اخى الكريم ان دول الخليج لايوجد عندهم ورش تصليح بكفاءة ولكن يتم تغيير القطع فقط وهذا يكلف اى سيارة وثانيا التفحيط بالبى ام يخرب السيارة وبعدين يقولون البى ام يخرب بسرعه

الموديلات القديمة صيانتها اسهل وقطع غيارها ارخص بس صعب ونادر جدا تلقى نظيف معظم النظيف هاتلاقيه فى المنطقة الشرقية عند اهل القطيف والاحساء باشوف هناك لى ام تسعينات كثير ومهتميين فيهم اذا راغب خليه ينزل زيارة للشرقية هايحصل طلبه بس اكرر اهم شىء النظافة

اخوي bmw 740il 

ايش تقصد ( واحد اكتشف انه لي طول الاصبع مقطول )

شكرا